അഘോരികൾ: ശ്മശാനത്തിലെ ശിവഭക്തർ, നിഗൂഢ സഞ്ചാരികൾ

ഇന്ത്യൻ ആത്മീയതയുടെ ലോകത്ത്, അഘോരി സന്യാസിമാർ എന്നും ഒരു വിസ്മയവും ഭയവും ആകാംഷയും ഉണർത്തുന്ന വിഭാഗമാണ്. പരമ്പരാഗതമായ എല്ലാ സാമൂഹിക നിയമങ്ങളെയും അതിർവരമ്പുകളെയും ലംഘിച്ച്, തീവ്രമായ ആരാദനാ രീതികളിലൂടെ മോക്ഷം തേടുന്നവരാണ് ഇവർ. സാധാരണക്കാർക്ക് ചിന്തിക്കാൻ പോലും കഴിയാത്ത ജീവിതരീതികളാണ് ഇവരുടേത്, അത് അവരെ നിഗൂഢതയുടെ വലയത്തിൽ നിർത്തുന്നു.

അഘോരി ആരാണ്?

'അഘോര' എന്ന വാക്കിനർത്ഥം, ഭയമില്ലാത്തവൻ അല്ലെങ്കിൽ വെളിച്ചം നിറഞ്ഞവൻ (ഭയാനകമല്ലാത്തത്) എന്നാണ്. ഭഗവാൻ ശിവന്റെ ഒരു രൂപമായ 'ഘോര' യുടെ നേർവിപരീതമായാണ് അഘോര രൂപത്തെ കണക്കാക്കുന്നത്. ശിവന്റെ 'ഭൈരവ' രൂപത്തെ ആരാധിക്കുന്നവരാണ് അഘോരികൾ.

അഘോരികളെ സംബന്ധിച്ചിടത്തോളം, ഈ ലോകം ശിവൻ സൃഷ്ടിച്ച ഒന്നാണ്, അതിൽ നല്ലതും ചീത്തയും, ശുദ്ധവും അശുദ്ധവും എല്ലാം ഒന്നുതന്നെയാണ്. അതുകൊണ്ടുതന്നെ, ഇവർക്ക് ഒരു വസ്തുവിനോടും വെറുപ്പോ വിദ്വേഷമോ ഇല്ല. അവർ ഭൗതികലോകത്തെ വിലക്കുകളെല്ലാം ഉപേക്ഷിച്ച്, സ്വന്തം ശരീരം പോലും ഒരു ഉപകരണം മാത്രമായി കണക്കാക്കി സാധനയിൽ മുഴുകുന്നു.

ജീവിതരീതികൾ:

അതിർത്തികൾ ലംഘിക്കുന്ന സാധന

അഘോരികളുടെ ജീവിതരീതികളാണ് അവരെ മറ്റ് സന്യാസിമാരിൽ നിന്ന് വേറിട്ട് നിർത്തുന്നത്.

ശ്മശാന വാസം: 

അഘോരികൾ ഭൂരിഭാഗം സമയവും ചിലവഴിക്കുന്നത് ശ്മശാനങ്ങളിലാണ് (മൃതദേഹങ്ങൾ ദഹിപ്പിക്കുന്ന ഇടം). ശിവന്റെ വാസസ്ഥലം ശ്മശാനമാണെന്ന് വിശ്വസിക്കുന്ന ഇവർ, ഈ സ്ഥലങ്ങളെ ഏറ്റവും ശുദ്ധവും സാധനയ്ക്ക് അനുയോജ്യവുമായ ഇടമായി കാണുന്നു.

നരഭോജനവും കപാലവും: അഘോരികളെക്കുറിച്ച് നിലനിൽക്കുന്ന ഏറ്റവും ഞെട്ടിക്കുന്ന വിശ്വാസങ്ങളിലൊന്നാണിത്. ആചാരത്തിന്റെ ഭാഗമായി, ഇവർ ദഹിപ്പിക്കാത്ത മനുഷ്യമാംസം കഴിക്കുമെന്നും, മനുഷ്യന്റെ തലയോട്ടി (കപാലം) പാത്രമായി ഉപയോഗിക്കുമെന്നും പറയപ്പെടുന്നു. മരണത്തെയും ജീവിതത്തെയും ഒരേപോലെ കാണാനുള്ള സാധനയുടെ ഭാഗമായാണ് ഇത് ചെയ്യുന്നത്.

ശരീരത്തിലെ ചാരം: 

ഇവർ ശരീരത്തിൽ മൃതദേഹങ്ങൾ ദഹിപ്പിച്ച ചാരം പൂശുന്നു. ഇത് ഭൗതികമായ സൗന്ദര്യബോധത്തെയും അഹന്തയെയും നിരാകരിക്കുന്നതിന്റെ സൂചനയാണ്.

ലഹരി ഉപയോഗം: 

സാധനയുടെ ഭാഗമായി, ഇവർ കഞ്ചാവ് പോലുള്ള ലഹരിവസ്തുക്കൾ ഉപയോഗിക്കാറുണ്ട്. അത് ഇവരെ ആഴത്തിലുള്ള ധ്യാനാവസ്ഥയിലേക്ക് കൊണ്ടുപോകാൻ സഹായിക്കുമെന്ന് വിശ്വസിക്കുന്നു.

അഘോരികൾ പൊതുവെ ഒരിടത്തും സ്ഥിരമായി താമസിക്കാത്ത സഞ്ചാരികളാണ്. എങ്കിലും, ചില പുണ്യസ്ഥലങ്ങളിലും വിശുദ്ധ നഗരങ്ങളിലുമുള്ള ശ്മശാനങ്ങളിൽ ഇവരെ കാണാൻ സാധിക്കും:

ഉത്തർപ്രദേശിലെ വാരണാസി (ബനാറസ്),  അഘോരികളുടെ കേന്ദ്രം എന്ന് വിളിക്കപ്പെടുന്ന സ്ഥലമാണിത്.

മണികർണ്ണിക ഘാട്ട് പോലുള്ള പ്രധാന ശ്മശാന ഘാട്ടുകളിലും, ഗംഗാ തീരങ്ങളിലും ഇവരെ കാണാൻ സാധിക്കും. ഇവിടെയാണ് ഇവരുടെ പ്രധാന ആരാധനാകേന്ദ്രമായ കിനാരം ബാബ ആശ്രമം സ്ഥിതി ചെയ്യുന്നത്.

താന്ത്രിക സാധനയുടെ പ്രധാന കേന്ദ്രമായതിനാൽ, ആസാമിലെ കാംരൂപ്-കാമാഖ്യയിലും  അഘോരികളെ കാണാൻ സാധിക്കും.

തീവ്രമായ സാധനക്കായി ഒറ്റപ്പെട്ട മലനിരകളിലും ഹിമാലയൻ താഴ്‌വരകളിലും ഇവരെ കണ്ടേക്കാം.

മധ്യപ്രദേശിലെ ഉജ്ജയിൻ മഹാകലേശ്വർ ക്ഷേത്രത്തോട് അനുബന്ധിച്ചുള്ള ശ്മശാനങ്ങളിലും ഇവരെ കാണാറുണ്ട്.

അഘോരികൾ പൊതുവെ ഒറ്റയ്ക്ക് ഇരിക്കാനും സാധനയിൽ മുഴുകാനുമാണ് ഇഷ്ടപ്പെടുന്നത്. നിങ്ങൾ അവരെ കാണുകയാണെങ്കിൽ, അവർക്ക് ശല്യമുണ്ടാക്കാത്ത രീതിയിൽ അകലം പാലിച്ച് ബഹുമാനത്തോടെ സമീപിക്കുക. അവരുടെ ജീവിതരീതികൾ സാധാരണക്കാർക്ക് മനസ്സിലാക്കാൻ ബുദ്ധിമുട്ടുള്ളതും ചിലപ്പോൾ ഭയപ്പെടുത്തുന്നതുമാണ്. അതുകൊണ്ട്, അവരെ കാണുമ്പോൾ വളരെയധികം ശ്രദ്ധയും കരുതലുമുണ്ടായിരിക്കണം.

അഘോരികളുടെ ലോകം ഭയത്തിന്റെയും വിശ്വാസത്തിന്റെയും അതിർവരമ്പുകൾ മായ്ച്ചുകളയുന്ന ഒന്നാണ്. ഭൗതികതയുടെ ഭ്രമം ഉപേക്ഷിച്ച്, ആത്മീയമായ പരമമായ സത്യത്തിലേക്ക് അടുക്കാൻ ശ്രമിക്കുന്ന ഇവരുടെ ജീവിതം ഇന്ത്യൻ ആത്മീയതയുടെ ഏറ്റവും സങ്കീർണ്ണമായ ഒരു മുഖമാണ്!